నామదేవుని భక్తి, అతని గృహస్థ జీవితానికి ఆటంకం కలిగించ లేదు. తల్లి, భార్య అప్పుడప్పుడు చిటపటలాడేవారు. అయినా సంసార కూపంలో పడలేదు. మట్టికీ, బంగారు కణికకూ తాను భేదం చూడలేదన్నాడు.
నామదేవ్ ఇంటి సమీపంలోనే పరిస్సా భగవత్ అనే బ్రాహ్మణుడు ఉండేవాడు. అతడు రఖుమాయిని (రుక్మిణి దేవిని) సంతుష్టపరచి ఒక పరశువేదిని సంపాదించాడు. ఆ రాయి ఇనుమును బంగారంగా మార్చేది. తన భార్య కమలజకు ఆ రాతిని ఇచ్చి ‘దీనిని ఇంట్లో భద్రపరచు, ఎవ్వరికీ చెప్పవద్దు’ అని గట్టిగా చెప్పాడు. అయినా ఆడవాళ్ల నోట్లో నూనెగింజ నానుతుందా? కమలజకు నామదేవుని భార్య ‘రాజై’ మంచి స్నేహితురాలు. ఒక మాటు నదిలో బట్టలు ఉతుకుతూ ఉండగా కమలజ, ‘సంసారాన్ని ఎలా లాక్కొస్తున్నా’ వని రాజైని అడిగింది. ‘నిరంతరం భగవన్నామంతో సంసారాన్ని పట్టించుకోని భర్తతో సంసారం చేయడం చాలా కష్టంగా ఉంది. పిల్లలకు పట్టెడన్నం పెట్టలేక పోతున్నా’ నని రాజై తన గోడును వినిపించింది.
నువ్వెలా సంసారాన్ని ఈడ్చుకొస్తున్నావని కమలజను రాజై అడిగింది. ‘మా ఇంట్లో పరుశువేది ఉంది. డబ్బు అవసరం వస్తే దాన్ని పాత్రలకు తాకిస్తాను, అవి బంగారంగా మారుతాయి. వాటితో కావలసిన సరకులను కొంటాం’ అని కమలజ చెప్పింది. ‘అయితే నువ్వు చాలా అదృష్టవంతురాలివి! ఒక మాటు ఆ పరుసవేది చూపిస్తావా?’ అని రాజై అడిగింది. కమలజ ఒకరోజు ఆ పరుసవేదినిని రాజైకి చూపించింది. ఒక రోజు మా ఇంట్లో ఉంచుకుంటానని అడిగి, ఆ పరుసవేదినిని ఇంటికి తీసుకువెళ్లి, పాత్రలకు తాకించి బంగారంగా మార్చి ధారాళంగా ఖర్చు పెట్టసాగింది.
భార్య వింత ప్రవర్తన చూసి ఏమిటీ హడావిడి? ఎలా అన్నీ కొనగలుగుతున్నావని నామదేవ్ ప్రశ్నించాడు. జరిగిందంతా రాజై చెప్పగా విన్నాడు. అప్పుడు ఆ పరుసవేదిని నదిలోకి విసిరి వేశాడు. ఈ రహస్యాన్ని బట్టబయలు చేశావని పరిస్సా భగవత్ భార్యను మందలించాడు. తన రాయిని తనకిమ్మంటూ నామదేవ్ ఇంటికి వెళ్లి నానారభస చేశాడు. ‘నా రాయిని దొంగిలించి పైపెచ్చు నదిలోకి విసిరివేసానంటున్నాడు, ఈ నామదేవ్ దొంగభక్తుడు’ అని నానా దుర్భాషలు మాట్లాడాడు.
అప్పుడు నామదేవ్ ‘అయ్యా! నీకు ఆ రాతిపై అంత మక్కువ ఉంటే నదిలోకి మునిగి తీసుకు వస్తా’ నని నదిలో దుమికి కొన్ని వందల రాళ్లను గట్టుపై వేశాడు. పరిస్సా భగవత్తో ‘ఇందులో నీ రాయి ఏదో గుర్తించ’ మని నామదేవ్ అన్నాడు. ప్రతి రాతిని లోహానికి తాకించాడు భగవత్. ప్రతి రాయి పరశువేదిలా ఉంది. ప్రజలందరూ ఆశ్చర్య చకితులయ్యారు. తుచ్ఛమైన భౌతిక సుఖాల కోసం జీవితం అంతా వ్యర్థం చేశానని బ్రాహ్మణుడు పశ్చాత్తాపం చెందాడు. అన్ని రాళ్లను నదిలోకి విసిరివేశాడు. నామదేవ్ కాళ్లపై పడ్డాడు. నీ చేతిని నా శిరస్సు పై ఉంచు, ఇక దేనినీ కోరనన్నాడు.
Related Articles:
- శాస్త్రజ్ఞానాన్ని పొంది పరితృప్తిచెందిన వాడు, నిర్వికారుడు, జితేంద్రియుడు, మట్టి రాయి బంగారాల పట్ల సమబుద్ధి కలవాడూ (హేయోపాదేయ బుద్ధిరహితుడు) అయిన యోగి, యోగారూఢుడనబడతాడు. (BG 6.8)