కవిం పురాణమనుశాసితారం
అణోరణీయాంసమనుస్మరేద్యః ।
సర్వస్య ధాతారమచింత్యరూపం
ఆదిత్యవర్ణం తమసః పరస్తాత్ ॥ 9
ప్రయాణకాలే మనసాచలేన
భక్త్యా యుక్తో యోగబలేన చైవ ।
భ్రువోర్మధ్యే ప్రాణమావేశ్య సమ్యక్
స తం పరం పురుషముపైతి దివ్యమ్ ॥ 10
కవిమ్, పురాణమ్, అనుశాసితారమ్, అణోః అణీయాంసమ్, అనుస్మరేత్, యః,
సర్వస్య, ధాతారమ్, అచింత్య రూపమ్, ఆదిత్యవర్ణమ్, తమసః, పరస్తాత్.
ప్రయాణకాలే, మనసా, అచలేన, భక్త్యా, యుక్తః, యోగ బలేన, చ, ఏవ,
భ్రువోః, మధ్యే, ప్రాణమ్, ఆవేశ్య, సమ్యక్, సః, తమ్, పరమ్, పురుషమ్, ఉపైతి, దివ్యమ్.
ప్రయాణ కాలే = మృత్యు సమయంలో; భక్త్యా యుక్తః = భక్తి యుక్తుడై; అచలేన మనసా = ఏకాగ్ర చిత్తంతో; యోగ బలేన = ధ్యాన అభ్యాసలబ్ధమైన చిత్త స్థైర్యంతో; భ్రువోః మధ్యే చ ఏవ = భ్రూమధ్యంలోనే; ప్రాణమ్ = ప్రాణాన్ని; సమ్యక్ = సంపూర్ణంగా; ఆవేశ్య = నిలిపి (ధారణచేసి); యః = ఎవరు; సర్వస్య = అందరి; ధాతారమ్ = కర్మఫల దాతను కవిమ్ = సర్వజ్ఞుడను; పురాణమ్ = ప్రాచీనుడు (అనాది); అనుశాసితారమ్ = విశ్వనియంతనూ; అణోః = సూక్ష్మమైన దానికంటే; అణీయాంసమ్ = సూక్ష్మతరుడును; అచింత్య రూపమ్ = అచింత్య స్వరూపుడూ; ఆదిత్య వర్ణమ్ = సూర్యునివలె స్వప్రకాశుడు, జ్యోతిష్మంతుడూ; తమసః = మోహాంధకారానికి; పరస్తాత్ = ఆవలనుండేవాడూ; (అయిన పురుషుని) అనుస్మరేత్ = స్మరించునో; సః = అతడు; తమ్ =ఆ; పరమ్ = శ్రేష్ఠుడును; దివ్యమ్ = జ్యోతిర్మయుడైన; పురుషమ్ = పురుషుణ్ణి (పరమేశ్వరుణ్ణి); ఉపైతి = పొందును.
తా ॥ (అనుస్మరణీయుడైన పురుషుని స్వరూపం వర్ణించబడుతోంది-) సర్వవిద్యా నిర్మాతా, సనాతనుడూ, విశ్వనియంతా, సూక్ష్మమైన దాని కంటే సూక్ష్మతరుడూ, మలినయుక్తాలైన మనోబుద్ధులకు అగోచరుడూ, సూర్యునివలే స్వప్రకాశ స్వరూపుడూ, అజ్ఞానాంధకారమైన ప్రకృతికి ఆవల ఉండేవాడూ, సర్వపోషకుడూ అయిన పరమేశ్వరుణ్ణి ఎవడు మృత్యుసమయంలో భక్తియుక్తుడై ఏకాగ్ర చిత్తంతో ధ్యానాభ్యాసలబ్ధమైన చిత్తస్థైర్యంతో, భ్రూమధ్యంలో ప్రాణాన్ని నిరోధించి, స్మరిస్తాడో; అతడు ఆ జ్యోతిర్మయుడైన పరమేశ్వరుణ్ణి పొందుతాడు.