నైవ కించిత్కరోమీతి యుక్తో మన్యేత తత్త్వవిత్ ।
పశ్యన్ శృణ్వన్ స్పృశన్ జిఘ్రన్ అశ్నన్ గచ్ఛన్ స్వపన్ శ్వసన్ ॥ 8
ప్రలపన్ విసృజన్ గృహ్ణన్ ఉన్మిషన్ నిమిషన్నపి ।
ఇంద్రియాణీంద్రియార్థేషు వర్తంత ఇతి ధారయన్ ॥ 9
న, ఏవ, కించిత్, కరోమి, ఇతి, యుక్తః, మన్యేత, తత్త్వ విత్,
పశ్యన్, శృణ్వన్, స్పృశన్, జిఘ్రన్, అశ్నన్, గచ్ఛన్, స్వపన్, శ్వసన్.
ప్రలపన్, విసృజన్, గృహ్ణన్, ఉన్మిషన్, నిమిషన్, అపి,
ఇంద్రియాణి, ఇంద్రియార్థేషు, వర్తంతే, ఇతి, ధారయన్.
తత్త్వవిత్ = పరమార్థద్రష్టయైన; యుక్తః = కర్మయోగి; పశ్యన్ = చూస్తూ; శృణ్వన్ = వింటూ; స్పృశన్ = తాకుతూ; జిఘ్రన్ = వాసన చూస్తూ; అశ్నన్ = తింటూ; గచ్ఛన్ = నడుస్తూ; స్వపన్ = నిద్రిస్తూ; శ్వసన్ = గాలిపీల్చుకుంటూ; ప్రలపన్ = పలుకుతూ; విసృజన్ = విడుస్తూ; గృహ్ణన్ = గ్రహిస్తూ; ఉన్మిషన్ = కన్నులు తెరుస్తూ; నిమిషన్ అపి = కన్నులు మూస్తూ; ఇంద్రియాణి = ఇంద్రియాలు; ఇంద్రియార్థేషు = ఇంద్రియ విషయాలయందు; వర్తంతే = ప్రవర్తిస్తున్నాయి; ఇతి = అని; ధారయన్ = నిశ్చయించుకొని; కించిత్ ఏవ = కొంచెమైనా; న కరోమి = నేను ఒనర్చింది లేదు; ఇతి = అని; మన్యేత = తలుస్తాడు.
తా ॥ (కర్మలను ఆచరిస్తున్నా బంధించబడడు అనేది విరుద్ధమే అనే ఈ శంకను, కర్తృత్వాభిమానం లేకపోతే కర్మబంధం కాదు అని చెప్పి నివారిస్తున్నాడు.) తత్త్వవేత్తయైన కర్మయోగి దర్శన, శ్రవణ, స్పర్శ, ఘ్రాణ, భోజన, గమన, నిద్ర, శ్వాసగ్రహణ, కథన, త్యాగ, గ్రహణ, ఉన్మేష, నిమేషాది ఇంద్రియ వ్యాపారాలలో, ‘ఇంద్రియాలు తమ తమ విషయాలలో ప్రవృత్తములవుతున్నాయి’ అని నిశ్చయించు కుని తాను ఏమీ చేయడం లేదని గ్రహిస్తాడు.