అర్జున ఉవాచ :
సన్న్యాసం కర్మణాం కృష్ణ పునర్యోగం చ శంససి ।
యచ్ఛ్రేయ ఏతయోరేకం తన్మే బ్రూహి సునిశ్చితమ్ ॥ 1
సన్న్యాసమ్, కర్మణామ్, కృష్ణ, పునః, యోగమ్, చ, శంససి,
యత్, శ్రేయః, ఏతయోః, ఏకమ్, తత్, మే, బ్రూహి, సునిశ్చితమ్.
కృష్ణ = కృష్ణా; కర్మణామ్ = శాస్త్రవిహితాలైన కర్మల; సన్న్యాసమ్ = త్యాగాన్ని; పునః = మళ్ళీ; (కర్మణాం) యోగం చ = కర్మయోగాన్ని; శంససి = చెబుతున్నావు; ఏతయోః = ఈ రెండింటిలో; యత్ = ఏది; శ్రేయః = శ్రేయస్కరమో; తత్ = ఆ; ఏకమ్ = ఒక్కదానిని; మే = నాకు; సునిశ్చితమ్ = బాగా దృఢపరచి; బ్రూహి = పల్కుము
తా ॥ (అజ్ఞాన సంభూతమైన సంశయాన్ని జ్ఞానఖడ్గంచే ఛేదించి కర్మయోగం అనుష్ఠించమని చెప్పబడింది; ఇక్కడ పూర్వాపర విరోధం ఉందని తలుస్తూ-) అర్జునుడు పలికెను: కృష్ణా! నీవు కర్మత్యాగాన్ని, కర్మానుష్ఠానాన్ని కూడా మళ్ళీ చెబుతున్నావు. ఈ రెండింటిలో ఏది శ్రేయస్కరమో, చక్కగా నిశ్చయించి నాకు తెలియజెప్పు. (గీత. 3–1, 6, 17; 4–18, 19, 21, 22, 24, 33, 34, 38, 42 చూ:)