శ్రీ భగవానువాచ :
బహూని మే వ్యతీతాని జన్మాని తవ చార్జున ।
తాన్యహం వేద సర్వాణి న త్వం వేత్థ పరంతప ॥ 5
బహూని, మే, వ్యతీతాని, జన్మాని, తవ, చ, అర్జున
తాని, అహమ్, వేద, సర్వాణి, న, త్వమ్, వేత్థ, పరంతప.
శ్రీభగవాన్ = శ్రీకృష్ణుడు; ఉవాచ = పలికెను; అర్జున = అర్జునా; మే = నాకూ; తవ చ = నీకు కూడా; బహూని = పెక్కు; జన్మాని = జన్మలు; వ్యతీతాని = గడిచాయి; పరంతప = అర్జునా; అహమ్ = నేను; తాని సర్వాణి = వాటినన్నింటినీ; వేద = ఎరుగుదును; త్వమ్ = నీవు; న వేత్థ = ఎరుగవు.
తా ॥ శ్రీభగవానుడు పలికెను: అర్జునా! నాకూ, నీకూ పెక్కుజన్మలు గడిచాయి. నేను వాటినన్నింటినీ ఎరుగుదును. కాని నీవు ఎరుగవు (మరిచావు). (ఏమన, ధర్మ-అధర్మాది సంస్కారాలతో నీ జ్ఞానశక్తి ఆవృతమైంది, నీవు మాయకు అధీనుడవు. కాని, నేను నిత్య–శుద్ధ–బుద్ధ–ముక్త స్వభావుడను. అలుప్త–విద్యాశక్తిని, మాయాధీశుణ్ణి అవడం చేత నా జ్ఞానశక్తి సర్వదా అనావృతం.
ఆత్మ అనాది, అనంతం, అజరం, అమరం
ఈ రోజు ఆదివారము, మహాపురుష్ మహరాజ్ వారి గదిలో మంచం మీద కూర్చొని ఉన్నారు. సమయం సుమారు ఉదయం 9 గంటలు. అనేక మంది భక్తులు వచ్చివున్నారు. వివిధ రకాల సంభాషణలు కొనసాగుతున్నాయి. వారిలో ఒక భక్తుడు మహాపురుష్ మహరాజ్ని సంబోధిస్తూ “మహరాజ్, మీ వయసెంత?” అని కుతూహలం కొద్ది అడిగారు.
మహరాజ్ : ఈ దేహము యొక్క వయస్సు అడుగుతున్నావా? సరిగా జ్ఞాపకము లేదు. 70 సం ॥ లు లేక 72 సం ॥ లు ఉండవచ్చు.
భక్తుడు : అలాగైతే మీరు నా కన్నా మూడు రెట్లు హెచ్చు వయస్సు గలవారు.
మహరాజ్ : అయ్యుండవచ్చు. మూడురెట్లు – మూడు రెట్లేమిటి? నేను అనాది కాలం నుంచి ఉన్నాను. అనాది, అనంతము, నిత్యము, అజరమైనది, అమరమైనది ఈ ఆత్మ. ఇది అందరిలోనూ ఉన్నది. ఇది శుద్ధ, బుద్ధ, ముక్త స్వరూపమైన చైతన్యము. పది, ఇరవై, ఏభై, వంద ఇలా లెక్కపెట్టడం మాయ. ఈ ఆత్మ సత్య స్వరూపము, సనాతన పురుషుడు. చిరకాలం నుండి మార్పులేక ఉన్నాడు. (Source: మహాపురుషుని మధుర భాషణలు)