శ్రేయాన్ ద్రవ్యమయాద్యజ్ఞాత్ జ్ఞానయజ్ఞః పరంతప ।
సర్వం కర్మాఖీలం పార్థ జ్ఞానే పరిసమాప్యతే ॥ 33
శ్రేయాన్, ద్రవ్యమయాత్, యజ్ఞాత్, జ్ఞానయజ్ఞః, పరంతప,
సర్వం, కర్మ, అఖీలమ్, పార్థ, జ్ఞానే, పరిసమాప్యతే.
పరంతప = అర్జునా; ద్రవ్యమయాత్ = ద్రవ్యసాధ్యమైన; యజ్ఞాత్ = యజ్ఞం కంటే; జ్ఞానయజ్ఞః = జ్ఞానరూపమైన యజ్ఞం; శ్రేయాన్ = శ్రేయస్కరం; పార్థ = అర్జునా; సర్వం కర్మ = సమస్త కర్మ; అఖీలమ్ = ఫల సమేతంగా; జ్ఞానే = బ్రహ్మజ్ఞానంలో; (తత్సాధనంగా) పరిసమాప్యతే = అంతర్గతమవుతోంది.
తా ॥ పరంతపా! ఫలారంభకాలూ, అనాత్మ వ్యాపార జన్యాలూ అయిన ద్రవ్యయజ్ఞాల కంటే, జ్ఞానయజ్ఞమే శ్రేష్ఠమైనది. (జ్ఞానం మనో వ్యాపారాధీనమే అయినప్పటికీ మనస్సు నుండి పుట్టడం లేదు, మనః పరిపక్వతను బట్టి అభివ్యక్తమవుతోంది.) పార్థా! ఫలసమేతంగా కర్మలు అన్నీ కూడా ఆత్మ జ్ఞానంలోనే అంతర్గతాలు అవుతున్నాయి.* (గీత: 2–46 చూ.)