సదృశం చేష్టతే స్వస్యాః ప్రకృతేర్ జ్ఞానవానపి ।
ప్రకృతిం యాంతి భూతాని నిగ్రహః కిం కరిష్యతి ॥ 33
సదృశమ్, చేష్టతే, స్వస్యాః, ప్రకృతేః, జ్ఞానవాన్, అపి,
ప్రకృతిమ్, యాంతి, భూతాని, నిగ్రహః, కిమ్, కరిష్యతి.
జ్ఞానవాన్ అపి = జ్ఞాని కూడా; స్వస్యాః = తన; ప్రకృతేః = స్వభావానికి, (జన్మాంతర సంస్కారానికి); సదృశమ్ = తగినట్లుగా; చేష్టతే = ప్రవర్తిస్తాడు; భూతాని = జనులు; ప్రకృతిమ్ = స్వభావాన్ని; యాంతి = అనుసరిస్తారు; నిగ్రహః = శాసనం, నిషేధం; కిం కరిష్యతి = ఏమి చేయగలదు.
తా ॥ (అలా అయితే, మహాఫల లాభార్థం అందరూ ఇంద్రియాలను నిగ్రహించి, నిష్కాములై స్వధర్మాన్ని అనుష్ఠించట్లేదు ఎందుకు? అని అంటావా:) జ్ఞాని కూడా తన ప్రకృతిని* అనుసరించే ప్రవర్తిస్తున్నాడు. ఇక అజ్ఞుల మాట ఏమి చెప్పను? జనులు ప్రకృతిని అనుసరించే కార్యాలను చేస్తున్నారు. ఇంద్రియనిగ్రహం ఏం చేయగలదు? ప్రకృతియే బలీయం.