బ్రహ్మభూతః ప్రసన్నాత్మా న శోచతి న కాంక్షతి ।
సమః సర్వేషు భూతేషు మద్భక్తిం లభతే పరామ్ ॥ 54
బ్రహ్మభూతః, ప్రసన్న ఆత్మా, న, శోచతి, న, కాంక్షతి,
సమః, సర్వేషు, భూతేషు, మద్భక్తిమ్, లభతే, పరామ్.
బ్రహ్మభూతః = బ్రహ్మజ్ఞానాన్ని పొందడానికి సమర్థుడు (బ్రహ్మజ్ఞాన నిష్ఠుడు); ప్రసన్న ఆత్మా = ఆత్మ ప్రసాదాన్ని పొంది; న శోచతి = ప్రాప్తవస్తువు నాశమైనా శోకించడు; న కాంక్షతి = అప్రాప్త వస్తువును కోరడు; సర్వేషు భూతేషు = సర్వభూతాల యందు; సమః = సముడైన (యతి); పరాం మద్భక్తిమ్ = జ్ఞానలక్షణమూ, మత్సంబంధమూ అయిన పరభక్తిని; లభతే = పొందుతాడు.
తా ॥ ఈ క్రమాన్ని అనుసరించి బ్రహ్మస్వరూపాన్ని పొందడానికి సమర్థుడైన వాడూ, కర్తృత్వాది విముక్తుడూ, లబ్ధాత్మా ప్రసాదుడూ, జ్ఞాననిష్ఠుడూ అయిన యతి ఏ విషయాన్ని గురించి కూడా శోకించడు. మరియు దేనినీ ఆకాంక్షించడు. అతనికి సర్వభూతాల సుఖదుఃఖాలూ తన సుఖదుఃఖాలే. మరియు, జ్ఞాన రూపము, మత్సంబంధము అయిన ఉత్తమ భక్తిని అతడు పొందుతాడు.* – భాష్యోత్కర్ష దీపిక.