దేవద్విజగురుప్రాజ్ఞపూజనం శౌచమార్జవమ్ ।
బ్రహ్మచర్యమహింసా చ శారీరం తప ఉచ్యతే ॥ 14
దేవ ద్విజ గురు ప్రాజ్ఞ పూజనమ్, శౌచమ్, ఆర్జవమ్,
బ్రహ్మచర్యమ్, అహింసా, చ, శారీరమ్, తపః, ఉచ్యతే.
దేవ–ద్విజ–గురు –ప్రాజ్ఞ–పూజనమ్ = దేవతలను, బ్రాహ్మణులను, గురువులను, జ్ఞానులను పూజించడం; శౌచమ్ = శుచిత్వం; ఆర్జవమ్ = ఋజుత్వం; బ్రహ్మచర్యమ్ = బ్రహ్మచర్యం; అహింసా చ = అహింస; శారీరమ్ = శారీరకమైన; తపః = తపస్సు అని; ఉచ్యతే = చెప్పబడుతోంది.
తా ॥ (ఆహార, యజ్ఞాలలో సాత్త్వికాది భేదాలు ప్రదర్శించబడ్డాయి; ఇక తపస్సులలో భేదాన్ని నిర్ణయించడానికి పూర్వం తపస్స్వరూపం తెలుపబడుతోంది:) దేవతలను-బ్రాహ్మణులను- గురువులను- తత్త్వవేత్తలను పూజించడం, శుచిత్వం, సత్ప్రవర్తన, బ్రహ్మచర్యం, అహింస అనేవి శరీరంతో చేయబడే తపస్సు అని చెబుతారు.