శ్రీ భగవానువాచ :
ప్రకాశం చ ప్రవృత్తిం చ మోహమేవ చ పాండవ ।
న ద్వేష్టి సంప్రవృత్తాని న నివృత్తాని కాంక్షతి ॥ 22
ప్రకాశమ్, చ, ప్రవృత్తిమ్, చ, మోహమ్, ఏవ, చ, పాండవ,
న, ద్వేష్టి, సంప్రవృత్తాని, న, నివృత్తాని, కాంక్షతి.
పాండవ = అర్జునా; సంప్రవృత్తాని = ఆవిర్భవించినట్టి; ప్రకాశం చ = సత్త్వగుణ ధర్మాన్ని; ప్రవృత్తిం చ = రజోగుణ ధర్మాన్ని; మోహమ్ ఏవ చ = తమోగుణ ధర్మాన్ని; (యః = ఎవడు;) న ద్వేష్టి = ద్వేషించడో; నివృత్తాని = నివృత్తమైన వాటిని; న కాంక్షతి = కోరకుండా ఉంటాడో (అతడు గుణాతీతుడని చెప్పబడును).
తా ॥ (గుణాతీతుని స్వసంవేద్య లక్షణాన్ని) శ్రీభగవానుడు పలికెను: పాండవా! ప్రకాశం, ప్రవృత్తి, మోహం అను సత్త్వరజస్తమః కార్యాలు వాటంతట అవియే ఆవిర్భవించినా గుణాతీత పురుషుడు (వాటిని దుఃఖాలుగా భావించి) ద్వేషించడు;* అవి నివృత్తములైనప్పుడు (సుఖాలుగా భావించి) ఆకాంక్షించడు.