ఇహైకస్థం జగత్కృత్స్నం పశ్యాద్య సచరాచరమ్ ।
మమ దేహే గుడాకేశ యచ్చాన్యద్ద్రష్టుమిచ్ఛసి ॥ 7
ఇహ, ఏకస్థమ్, జగత్, కృత్స్నమ్, పశ్య, అద్య, స చర అచరమ్.
మమ, దేహే, గుడాకేశ, యత్, చ, అన్యత్, ద్రష్టుమ్, ఇచ్ఛసి.
గుడాకేశ = అర్జునా; ఇహ = ఈ; మమ దేహే = నా శరీరంలో; ఏకస్థమ్ = (శరీరావయవం వలె) ఒక్కచోటనే ఉన్న; స చర అచరమ్ = స్థావర జంగమ సహితమైన; జగత్ = విశ్వాన్ని; కృత్స్నమ్ = సమస్తాన్ని; అన్యత్ చ = మరియు, ఇతరమైన; యత్ = దేనిని; ద్రష్టుమ్ ఇచ్ఛసి = చూడ గోరుతున్నావో; అద్య = నేడు (దానినంతటిని కూడా); పశ్య = చూడు.
తా ॥ అర్జునా! ఈ నా విరాట్ దేహంలో అవయవం వలె ఒక్కటే అయ్యి వెలయుచున్న స్థావరజంగమాత్మకమైన విశ్వాన్నంతటిని చూడు. మరియు, (జగదాశ్రయభూతమైన కారణస్వరూపమూ, జగత్తు యొక్క స్థితిగతులూ, జయాపజయాలూ మొదలుగా) నీవు చూడగోరే దానినంతటినీ దర్శించు.