అర్జున ఉవాచ :
కైర్లింగైః త్రీన్ గుణానేతాన్ అతీతో భవతి ప్రభో ।
కిమాచారః కథం చైతాన్ త్రీన్ గుణానతివర్తతే ॥ 21
కైః, లింగైః, త్రీన్, గుణాన్, ఏతాన్, అతీతః, భవతి, ప్రభో,
కిమాచారః, కథమ్, చ, ఏతాన్, త్రీన్, గుణాన్, అతివర్తతే.
ప్రభో = భగవంతుడా; ఏతాన్ = ఈ; త్రీన్ = మూడు; గుణాన్ = గుణాలకు; అతీతః = అతీతుడు (ముక్తుడు); కైః లింగైః = ఏ లక్షణాలతో కూడినవాడిగా; కిమాచారః = ఎటువంటి ఆచారం కలిగి; భవతి = ఉంటాడు; కథం చ = ఏ ఉపాయంతో; ఏతాన్ = ఈ; త్రీన్ గుణాన్ = గుణత్రయాన్ని; అతివర్తతే = అతిక్రమిస్తున్నాడు.
తా ॥ (జీవితకాలంలోనే గుణాలను అతిక్రమించి, అమృతత్వాన్ని పొందుతాడని చెప్పబడింది; ఆ గుణాతీతుని గురించి లెస్సగా తెలుసుకో గోరుచూ) అర్జునుడు ప్రశ్నించెను: ప్రభూ! గుణాతీత పురుషుని లక్షణాలు ఏవి? అతని ఆచరణ ఏ విధంగా ఉంటుంది? ఈ గుణాలను అతిక్రమించడం ఎలా? (మూడు ప్రశ్నలు).