నాన్యం గుణేభ్యః కర్తారం యదా ద్రష్టానుపశ్యతి ।
గుణేభ్యశ్చ పరం వేత్తి మద్భావం సోఽధిగచ్ఛతి ॥ 19
న, అన్యమ్, గుణేభ్యః, కర్తారమ్, యదా, ద్రష్టా, అనుపశ్యతి,
గుణేభ్యః, చ, పరమ్, వేత్తి, మద్భావమ్, సః, అధిగచ్ఛతి.
యదా = ఎప్పుడైతే; ద్రష్టా = దర్శకుడు (వివేకియైనజీవుడు); గుణేభ్యః = గుణాల నుండి; అన్యమ్ = వేరైన; కర్తారమ్ = కర్తను; న అనుపశ్యతి = చూడటం లేదో; (చూడడో) గుణేభ్యః చ = త్రిగుణాలకు; పరమ్ = అతీతుడైన సాక్షిని; వేత్తి = తెలుసుకుంటాడో; (తదా = అప్పుడు;) సః = అతడు; మద్భావమ్ = నా స్వరూపాన్ని; అధిగచ్ఛతి = పొందుతాడు.
తా ॥ (ఇంతవరకూ గుణ సంగ–కృతమైన సంసారం వర్ణింపబడింది; ఇక తద్వ్యతిరిక్తమైన మోక్షాన్ని ప్రదర్శిస్తున్నాడు -) ద్రష్టయైన జీవుడెప్పుడు వివేకాన్ని గణించి, (బుద్ధ్యాద్య ఆకారంగా పరిణమించిన) గుణాల కంటే వేరైన కర్తను చూడడో (గుణాలే కర్మలను ఒనర్చుతున్నాయని చూస్తాడో) మరియు; ఈ గుణ వ్యాపారాలకు అతీతుడై సాక్షిగా ఉన్న ఆత్మను దర్శిస్తాడో, అప్పుడతడు నా భావాన్ని (అంటే బ్రహ్మ స్వరూపాన్ని) పొందుతాడు.