యదా భూతపృథగ్భావం ఏకస్థమనుపశ్యతి ।
తత ఏవ చ విస్తారం బ్రహ్మ సంపద్యతే తదా ॥
యదా, భూత పృథక్ భావమ్, ఏకస్థమ్, అనుపశ్యతి,
తతః, ఏవ, చ, విస్తారమ్, బ్రహ్మ, సంపద్యతే, తదా.
యదా = ఎప్పుడు; భూత పృథక్ భావం = భూతసమూహాల పార్థక్యం, బహుత్వం, నానాత్వం; ఏకస్థమ్ = ఒక్క ఆత్మ యందే నెలకొని ఉండడాన్ని; తతః ఏవ చ = దాని నుండే (ఆ ఆత్మ నుండే); విస్తారమ్ = ఉత్పత్తిని (నానాత్వమును); అను పశ్యతి =శాస్త్రాచార్యోపదేశాన్ని అనుసరించి దర్శిస్తాడో; తదా = అప్పుడు; బ్రహ్మ సంపద్యతే = బ్రహ్మస్వరూపుడు అవుతాడు.
తా ॥ యోగి ఎప్పుడు వివిధ భూతాల ఉనికిని ఆత్మయందు* దర్శిస్తాడో, మరియు ఆ ఆత్మ నుండే భూతాల ఉత్పత్తియని గ్రహిస్తాడో, అప్పుడతడు బ్రహ్మ స్వరూపుడవుతాడు. (గీత : 6-29, 30; 18-20 చూ:) [లేక] యోగి ఎప్పుడు, ‘ఈ భేదసృష్టి అంతా ప్రళయకాలంలో ఏకమై ఈశ్వరశక్తియైన ప్రకృతియందు లయించి, మళ్ళీ సృష్టి సమయంలో వెలికి వస్తున్నది – ఇదంతా కూడా దాని విస్తృతియే’ అని గ్రహిస్తాడో, అప్పుడు ఈ అభేద దర్శన ఫలంగా అతడు బ్రహ్మమే అవుతాడు. (గీత : 6-7 చూ:)