యే త్వక్షరమనిర్దేశ్యం అవ్యక్తం పర్యుపాసతే ।
సర్వత్రగమచింత్యం చ కూటస్థమచలం ధ్రువమ్ ॥ 3
సంనియమ్యేంద్రియగ్రామం సర్వత్ర సమబుద్ధయః ।
తే ప్రాప్నువంతి మామేవ సర్వభూతహితే రతాః ॥ 4
యే, తు, అక్షరమ్, అనిర్దేశ్యమ్, అవ్యక్తమ్, పర్యుపాసతే,
సర్వత్రగమ్, అచింత్యమ్, చ, కూటస్థమ్, అచలమ్, ధ్రువమ్.
సంనియమ్య, ఇంద్రియగ్రామమ్, సర్వత్ర, సమబుద్ధయః,
తే, ప్రాప్నువంతి, మామ్, ఏవ, సర్వభూతహితే, రతాః.
తు = కాని; యే = ఎవరు; సర్వత్ర = అన్నింట; సమబుద్ధయః = సమబుద్ధికలిగి; సర్వ భూత హితే రతాః = సకలప్రాణుల శ్రేయమందూ ఆసక్తులై; ఇంద్రియ గ్రామమ్ = ఇంద్రియ సమూహాన్ని; సంనియమ్య = నిగ్రహించి; అనిర్దేశ్యమ్ = సూచింప వీలు కానిదీ; అవ్యక్తమ్ = ప్రమాణాతీతమూ; సర్వత్రగమ్ = సర్వవ్యాపీ; అచింత్యమ్ = మనస్సుకు అందనిదీ; కూటస్థమ్ = మాయకు అధిష్ఠానమై వెలయునదీ; అచలమ్ = స్థిరమూ; ధృవమ్ చ = నిత్యమూ అయిన; అక్షరమ్ = నిర్గుణబ్రహ్మాన్ని; పర్యుపాసతే = ఉపాసిస్తున్నారో; తే = వారు; మామ్ ఏవ = నన్నే; ప్రాప్నువంతి = పొందుతున్నారు.
తా ॥ కాని ఎవరు ఎల్లప్పుడూ ఇష్ట-అయిష్ట ప్రాప్తియందు కూడా సమబుద్ధులై, జగత్ హితమున నియుక్తులై ఇంద్రియనిగ్రహ పూర్వకంగా అనిర్వచనీయమూ, అప్రమేయమూ, ప్రమాణాతీతమూ, కూటస్థమూ* , అచలమూ, నిత్యమూ, ఆకాశం వలే సర్వవ్యాపి అయిన నిర్గుణబ్రహ్మాన్ని ఉపాసిస్తున్నారో, వారు నన్నే పొందుతారు. (గీత 7-18 చూ:)