అర్జున ఉవాచ :
మదనుగ్రహాయ పరమం గుహ్యమధ్యాత్మసంజ్ఞితమ్ ।
యత్త్వయోక్తం వచస్తేన మోహోఽయం విగతో మమ ॥ 1
మదనుగ్రహాయ, పరమమ్, గుహ్యమ్, అధ్యాత్మ సంజ్ఞితమ్,
యత్, త్వయా, ఉక్తమ్, వచః, తేన, మోహః, అయమ్, విగతః, మమ.
అర్జున = అర్జునుడు; ఉవాచ = పలికెను; మదనుగ్రహాయ = నన్ను అనుగ్రహింప; పరమమ్ = ఉత్కృష్టమూ; గుహ్యమ్ = అత్యంత రహస్యమూ; అధ్యాత్మ సంజ్ఞితమ్ = ఆత్మానాత్మ వివేక విషయమూ, ఆధ్యాత్మమూ అయిన; యత్ = ఏ; వచః = వాక్యం; త్వయా = నీచే; ఉక్తమ్ = చెప్పబడిందో; తేన = దాని చేత; మమ = నా; అయమ్= ఈ; మోహః = భ్రమ; విగతః = తొలగింది;
తా ॥ [ ‘నేను ఏకాంశం చేత సమస్త జగత్తును వ్యాపించి ధరిస్తున్నాను’ (గీత. 10-42) అనే భగవద్వాక్యాన్ని విని జగదాత్మకమైన ఈశ్వర రూపాన్ని చూడగోరి] అర్జునుడు పలికెను: భగవంతుడా! నన్ను అనుగ్రహించడానికి పరమమూ, అత్యంత రహస్యమూ, ఆత్మ-అనాత్మ వివేక విషయమూ, అధ్యాత్మ మనబడేదీ అయిన తత్త్వాన్ని* నాకు బోధించావు; దీనిచేత నా ఈ మోహం* తొలగింది.