బుద్ధిర్ జ్ఞానమసంమ్మోహః క్షమా సత్యం దమశ్శమః ।
సుఖం దుఃఖం భవోఽభావో భయం చాభయమేవ చ ॥ 4
అహింసా సమతా తుష్టిః తపో దానం యశోఽయశః ।
భవంతి భావా భూతానాం మత్త ఏవ పృథగ్విధాః ॥ 5
బుద్ధిః, జ్ఞానమ్, అసమ్మోహః, క్షమా, సత్యమ్, దమః, శమః,
సుఖమ్, దుఃఖమ్, భవః, అభావః, భయమ్, చ, అభయమ్, ఏవ, చ.
అహింసా, సమతా, తుష్టిః, తపః, దానమ్, యశః, అయశః,
భవంతి, భావాః, భూతానామ్, మత్తః, ఏవ, పృథగ్విధాః.
బుద్ధిః = సూక్ష్మవిషయ గ్రహణ సామర్థ్యం; జ్ఞానమ్ = ఆత్మాది పదార్థాల అవబోధ; అసమ్మోహః = ప్రత్యుత్పన్నమతిత్వం, (వ్యాకులతా భావం); క్షమా = సహిష్ణుత; సత్యమ్ = విన్నది విన్నట్లు, చూసింది చూసినట్లువచించడం; (యథార్థభాషణం). దమః = బాహ్యేంద్రియ సంయమం; శమః = అంతరింద్రియ సంయమం; సుఖమ్ = ఆహ్లాదం; దుఃఖమ్ = సంతాపం; భవః = ఉత్పత్తి; అభావః = వినాశం; భయం ఏవ చ = మరియు, భీతి; అభయమ్ = భయరహితత్వం; అహింసా = ప్రాణిపీడ నొనర్పకుండుట; సమతా = సమ చిత్తత; తుష్టిః = సంతోషం; తపః = మనోవాక్కాయసంయమం; దానమ్ = దానం; యశః = ధర్మనిమిత్తమైన కీర్తి; అయశః = అధర్మనిమిత్తమైన అపకీర్తి; (ఏతే = ఇవి;) భూతానామ్ = ప్రాణులకు; పృథగ్విధాః =స్వకర్మానుసారం విభిన్నాలైన; భావాః = భావాలు; మత్తః ఏవ = నా నుండియే; భవంతి = ఉత్పన్నమౌతున్నాయి.
తా ॥ (సర్వలోక మహేశ్వరత్వం వివరించబడుతోంది:) సూక్ష్మవిషయ గ్రహణ సామర్థ్యం, ఆత్మాది పదార్థాల జ్ఞానం, ప్రత్యుత్పన్నమతిత్వం, సహిష్ణుత, సత్యం, బాహ్యాంతరింద్రియ సంయమం, సుఖం, దుఃఖం, జన్మ, మృతువు, భయం, అభయం, అహింస, సమచిత్తత, సంతోషం, తపస్సు, దానం, ధర్మనిమిత్తమైన కీర్తి, అధర్మనిమిత్తమైన అపకీర్తి, మొదలైన విభిన్న భావాలు ప్రాణులకు స్వకర్మానుసారంగా నా నుండే కలుగుతున్నాయి.