యాంతి దేవవ్రతా దేవాన్ పితౄన్ యాంతి పితృవ్రతాః ।
భూతాని యాంతి భూతేజ్యా యాంతి మద్యాజినోఽపి మామ్ ॥ 25
యాంతి, దేవవ్రతాః, దేవాన్, పితౄన్, యాంతి, పితృవ్రతాః,
భూతాని, యాంతి, భూత ఇజ్యాః, యాంతి, మద్యాజినః, అపి, మామ్.
దేవవ్రతాః = దేవోపాసకులు; దేవాన్ = ఇంద్రాదిదేవతలను; యాంతి = పొందుచున్నారు; పితృవ్రతాః = శ్రాద్ధాదిక్రియా పరాయణులైన పితృపూజకులు; పితౄన్ = అర్యమాదులైన పితృదేవతలను; యాంతి = పొందుచున్నారు; భూత ఇజ్యాః = భూతోపాసకులు; భూతాని = వినాయకమాతృ గణాది భూతములను; యాంతి = పొందుచున్నారు; మద్యాజినః = నన్ను పూజించేవారు; మామ్ అపి = అక్షయ పరమానంద స్వరూపుడనైన నన్నే(నారాయణుని); యాంతి = పొందుచున్నారు.
తా ॥ దేవోపాసకులు (అనిత్యులైన ఇంద్రాది) దేవతలను పొందుతున్నారు. (శ్రాద్ధాది క్రియాపరాయణులైన) పితృభక్తులు (అర్యమాది) పితృగణాలను చేరుతున్నారు. భూతపూజకులు (వినాయకమాతృగణాది) భూతాలను పొందుతున్నారు; నన్ను పూజించేవారు (అక్షయ–పరమానంద స్వరూపుడనైన) నన్నే బడయుచున్నారు (మళ్ళీ జన్మించరు). (గీత. : 7–23 చూ; శ్రీమద్భాగవతమ్. 11–21–26, 33 చూ.)