యదక్షరం వేదవిదో వదంతి
విశంతి యద్యతయో వీతరాగాః ।
యదిచ్ఛంతో బ్రహ్మచర్యం చరంతి
తత్తే పదం సంగ్రహేణ ప్రవక్ష్యే ॥ 11
యత్, అక్షరమ్, వేదవిదః, వదంతి, విశంతి, యత్, యతయః, వీతరాగాః,
యత్, ఇచ్ఛంతః, బ్రహ్మచర్యమ్, చరంతి, తత్, తే, పదమ్, సంగ్రహేణ, ప్రవక్ష్యే.
వేద విదః = వేదజ్ఞులు; యత్ = దేనిని; అక్షరమ్ = అవినాశియైన పురుషుడని; వదంతి = చెప్పుచున్నారో; వీతరాగాః = విషయాసక్తిశూన్యులు, (నిస్పృహులైన); యతయః = యతులు; యత్ = దేనియందు; విశంతి = ప్రవేశిస్తున్నారో; యత్ = దేనిని; ఇచ్ఛంతః = తెలిసికోగోరి; బ్రహ్మచర్యమ్ = బ్రహ్మచర్యాన్ని; చరంతి = పాటించుదురో; తత్ = ఆ; పదమ్ = బ్రహ్మపదాన్ని; తే = నీకు; సంగ్రహేణ = సంక్షిప్తంగా; ప్రవక్ష్యే = చెబుతాను.
తా ॥ (ఓంకారాభ్యాస శ్రేష్ఠత్వం సూచించబడుతోంది-) వేదజ్ఞులు దేనిని అక్షరపురుషుడని వర్ణిస్తున్నారో, నిస్పృహులైన యతులు దేనిని పొందుతున్నారో జిజ్ఞాసువులు దేనిని పొందడానికి (గురు గృహంలో) బ్రహ్మచర్య వ్రతాన్ని పాటిస్తున్నారో, గమ్యమైన ఆ బ్రహ్మాన్ని గురించి నీకు సంక్షిప్తంగా చెబుతున్నాను. (కఠోపనిషత్తు. 1–2–15 చూ:)