యోగసంన్యస్త కర్మాణం జ్ఞానసంఛిన్నసంశయమ్ ।
ఆత్మవంతం న కర్మాణి నిబధ్నంతి ధనంజయ ॥ 41
యోగసంన్యస్త కర్మాణమ్, జ్ఞాన సంఛిన్న సంశయమ్,
ఆత్మవంతమ్, న, కర్మాణి, నిబధ్నంతి, ధనంజయ.
ధనంజయ = అర్జునా; యోగసన్న్యస్త కర్మాణమ్ = బ్రహ్మజ్ఞానం చేత ధర్మాధర్మకర్మలను త్యజించినవాడూ; జ్ఞాన సంచ్ఛిన్న సంశయమ్ = బ్రహ్మజ్ఞానం చేత సంశయాలన్నీ తొలగినవాడూ; (అయిన) ఆత్మవంతమ్ = అప్రమత్తపురుషుని; కర్మాణి = కర్మలు; న నిబధ్నంతి = బంధించవు.
తా ॥ పరమాత్మ దర్శనంతో ధర్మాధర్మాలు త్యజించినవాడూ (లేక పరమేశ్వరారాధనమనే కర్మయోగంలో కర్మలనన్నిటిని భగవంతునికి అర్పించిన వాడూ, తరువాత లభించిన) జ్ఞానం చేత సమస్త సందేహాలు తొలగినవాడూ అయిన అప్రమత్త పురుషుని కర్మలు (ఇష్టానిష్ట మిశ్ర ఫలోత్పాదకాలై) ప్రతి బంధకాలు కాలేవు. (లేక అతని స్వాభావిక కర్మ గాని, లోకసంగ్రహార్థమైన కర్మ గాని బంధహేతువు కాదు.) (గీత. 18–12 చూ:)